|
မုန်တိုင်းဒုက္ခသည်များကို အကူအညီပေးနေသည့်
ဇာဂနာ (ခေါ်) ကိုသူရကို
အာဏာပိုင်များက ဖမ်းဆီးခဲ့
ဖြိုးကြီး။
ဇွန် ၅၊ ၂၀၀၈
နာဂစ်ဆိုက်ကလုန်းလေဘေးဒုက္ခသည်များအား တက်တက်ကြွကြွ ကူညီနေသည့်
လူရွှင်တော် သရုပ်ဆောင် ဒါရိုက်တာ ဇာဂနာ (ခေါ်) ကိုသူရကို အာဏာပိုင်များက
ဖမ်းဆီးသွားသည်။
ကိုဇာဂနာ၏ နေအိမ်သို့ အာဏာပိုင်များက ယမန်နေ့ ညဦးပိုင်းတွင်
ဝင်ရောက်ရှာဖွေမှုများ ပြုလုပ်ခဲ့ပြီး မည်သည့်အတွက်ကြောင့် ယခုကဲ့သို့
ဖမ်းဆီးသွားသည်ကိုမသိကြောင်း မိသားစုဝင် တဦးက ပြောသည်။
လာရောက်ဖမ်းဆီးသွားသူများမှာ အထူးရဲတပ်ဖွဲ့(SB)၊ စရဖ၊ ခရိုင်မှူးအပါအဝင် (၇) ဦးနှင့် ရပ်ကွက်အာဏာပိုင် (၂)
ဦး၊ စုစုပေါင်း
(၉) ဦးဖြစ်သည်ဟု ဆိုသည်။
ကိုဇာဂနာကို ဖမ်းဆီးသွားပုံနှင့်ပတ်သက်၍ မိသားစုဝင်တဦးက “သူတို့လာတုန်းက အိမ်မှာ ရှာတယ်၊ ဘာရှာမယ်ဆိုတာလဲ မပြောဘူး၊ ဘာကြောင့် ခေါ်သွားတယ်ဆိုတာကိုလည်း မပြော ဘူး၊ သူတို့ပြောတာက တရက်နှစ်ရက်ပါပဲဆိုပြီး
ဆေးတို့၊ အဝတ်အစားတို့ ထည့်ခိုင်းပြီး ခေါ်သွားတာ”ဟု ပြောသည်။
အာဏာပိုင်များက
ကိုဇာဂနာနေအိမ်သို့ လာရောက်ရှာဖွေပြီးနောက်
စိန်စီသောညဗွီဒီယို တခွေ၊ ရမ်ဘို(ဖိုး) တခွေ၊ နာဂစ်မုန်တိုင်းတခွေ၊ (FEC) သုံးဆယ်နှင့် သမီးဖြစ်သူကို ပို့ပေးရန်အတွက်
ဝယ်ယူထားသည့် ဒေါ်လာ (၁,၀၀၀)
တို့ကို ရှာဖွေပုံစံများဖြင့် သိမ်းဆီးသွားသည်ဟု ၎င်းက ဆက်လက်ပြောသည်။
“ကျမတို့စိုးရိမ်တာက သူတို့က ဥပဒေကို လီဆယ်တတ်တော့
ပုဒ်မအမျိုးမျိုးတပ်မှာကိုပဲ၊ အခု ထိတော့ ဘယ်မှာထားတယ်ဆိုတာကို
သတင်းမရသေးဘူး၊ ကျမတို့က မယုံဘူး၊ သူတို့က
ဒီလိုပဲ ပြောနေတာ အမြဲတမ်းပဲ၊ ပြောပြောပြီးခေါ်သွားတာ၊ သူတို့က အမျိုးမျိုးလီဆယ်တတ်တဲ့သူတွေ၊ ရှင်းရှင်းပြောရရင်
ကျမတို့က အမြဲတမ်း အနိုင်ကျင့်ခံနေရတာ”ဟု မိသားစုဝင်တယောက်အနေ ဖြင့်
စိုးရိမ်နေမှုကို ပြောသည်။
ကိုဇာဂနာသည် နာဂစ်မုန်တိုင်းကယ်ဆယ်ရေး အကူအညီလုပ်ငန်းများကို
မေ (၇) မှစတင်ကာ လုပ်ဆောင်နေပြီး လူမှုရေးသက်သက်သာ အကူညီပေးနေခြင်းဖြစ်ကာ
အာဏာပိုင်များက ယခု ကဲ့သို့ ဖမ်းဆီးသွားခြင်းမှာ အကြောင်းမဲ့
အနိုင်ကျင့်နေခြင်းသာဖြစ်သည်ဟု ၎င်းက ဆက်လက် ပြောသည်။
“ရှင်းရှင်းပြောရရင် ကိုသူရက (၇) ရက်နေ့ကစပြီး လူမှုရေးပဲလုပ်နေတာ၊
ဘာနိုင်ငံရေးမှာမှ မပါဘူး၊ သူများတွေလည်း လုပ်နေတာ၊ ကိုသူရကျမှ
အခုလိုလုပ်တာ၊ အနုပညာလောက က လူတွေအကုန်လုံး လုပ်နေတာ၊ ဘယ်သူ့မှ ခေါ်စစ်တာမရှိဘူး၊ တခုခုဖြစ်ရင် ဇာဂနာ ဇာဂနာနဲ့ အဲလိုပဲ လုပ်နေတာ”ဟု
မိသားစုဝင်က ပြောသည်။
နာဂစ်မုန်တိုင်းကယ်ဆယ်ရေးလုပ်ငန်းများကို ကိုဇာဂနာနှင့်အတူ တွဲလုပ်နေသော အခြား အနုပညာရှင်များဖြစ်သည့် ဟာသသရုပ်ဆောင်
ကိုအရိုင်း၊ ကိုငှက်ပျောကြော်တို့ကို အာဏာပိုင် များက
မေးမြန်းမှုများပြုလုပ်ခဲ့ပြီး လူမှုရေးလုပ်ငန်းများလုပ်နေတာ
ကောင်းမွန်ကြောင်းနှင့် ဆက်လက်လုပ်ဆောင်ပါဟု ပြောဆိုခဲ့ကြောင်း ၎င်းက ဆက်လက်ပြောဆိုခဲ့သည်။ |
