သတင်း

လုံခြုံရေးတင်းကြပ်သဖြင့် တောင်ကုတ်ဆန္ဒပြပွဲပျက်

ဗထူး။ ဇန်နဝါရီ ၁၇၊ ၂၀၀၈ 

ရခိုင်ပြည်နယ်၊ တောင်ကုတ်မြို့တွင် အထွေထွေအကြပ်အတည်းများကို မခံမရပ်နိုင်သည့် ပြည်သူများ၏ဆန္ဒပြပွဲ ဖြစ်မည်ကို စိုးရိမ်ကာ လုံခြုံရေးများ တိုးမြှင့်ထားသည့်အတွက် ဆန္ဒမပြ ဖြစ်ဘဲ လူစုခွဲလိုက်ရသည်။ 

တောင်ကုတ်မြို့နယ်အတွင်း စစ်အစိုးရက ဒေသခံများအပေါ် အဓမ္မ ဖိနှိပ်နေခြင်းကြောင့် ယခု ကဲ့သို့ ဆန္ဒပြမည့်အခြေအနေ ဖြစ်ပေါ်ခဲ့ခြင်းဖြစ်သည်။ 

သံဃာ ၁၀ ပါး အပါအ၀င် လူထု ၂၀၀ ခန့်တို့က တောင်ကုတ်မြို့ဈေးအနီးတွင် ဆန္ဒပြရန် စီစဉ်ခဲ့ ခြင်းဖြစ်ပြီး အများစုမှာ အဆိုပါမြို့နယ်ရှိ ကျေးရွာများမှဖြစ်သည်။ 

“လုံခြုံရေးတွေတော့ တအားချထားတယ်၊ ကျနော်တောင် မသိလိုက်ဘူး၊ ဘာကြောင့်ချမှန်းကို မသိတာ၊ ဈေးကိုလည်း ပိတ်ထားတယ်၊ ဘာကြောင့်ဈေးပိတ်တယ်ဆိုတာကို နောက်မှ မေးကြည့်လို့ သိတာ၊ ဒီနေ့က ဆန္ဒပြမှုတွေရှိတယ်၊ အဲဒါကြောင့် ဈေးပိတ်တာလို့ပြောတယ်” ဟု တောင်ကုတ်မြို့ခံတဦးက ဆိုသည်။ 

စစ်တပ်၊ ရဲ၊ စွမ်းအားရှင်၊ ကြံ့ဖွံ့နှင့် လုံထိန်းတပ်ဖွဲ့ဝင်များက သေနတ်၊ ဒိုင်းများ ကိုင်ဆောင်ထား ကြပြီး တောင်ကုတ်မြို့ဈေးအား နံနက်အချိန်ကတည်းက ပိတ်ထားခဲ့ပြီး ကျန်းမာရေးအတွက် ဆေးဖျန်းရန် ဈေးပိတ်ထားကြောင်း အာဏာပိုင်များကပြောဆိုသည်ဟု ၄င်းက ဆက်လက်ပြော ဆိုသည်။

“တောင်ကုတ်မြို့ရဲ့ သမိုင်းဝင်ဖောင်တော်ဦးစေတီရဲ့မုခ်ဝ၊ ကျောင်းဝိုင်းတွေ၊ လ္ဘက်ရည်ဆိုင် တွေ၊ လမ်းမတွေမှာ စစ်တပ်တွေ ရဲလုံထိန်းတွေ စွမ်းအားရှင်တွေက လုံခြုံရေးတင်းကြပ်အောင် ချထားပြီး လမ်းကို ပိတ်တယ်၊ ဘယ်လိုမှ လူထုတက်လာလို့ မရအောင်ပေါ့”ဟု မြို့ခံက ပြောသည်။ 

တောင်ကုတ်မြို့နယ် အင်န်အယ်ဒီအဖွဲ့ဝင် ဦးခင်လှနှင့် ကိုမင်းအောင်တို့အား ဖမ်းဆီးထားခြင်း အပါအဝင် စစ်အစိုးရက ဒေသအတွင်းတွင် စိုက်ပျိုးဖြစ်ထွန်းနိုင်ခြင်းမရှိသော ပန်းနှမ်းနှင့် နေကြာများ အတင်းအဓမ္မ စိုက်ပျိုးခိုင်းခြင်းနှင့် လယ်သမားများထံမှ တပ်ရိက္ခာအဖြစ် စပါး ဈေးနှိမ်ဝယ်ယူခဲ့ခြင်းကြောင့် နယ်မှလူများ မခံမရပ်နိုင်ဖြစ်ခဲ့ပြီး ယခုကဲ့သို့ ဆန္ဒပြရန် စီစဉ်ခြင်း ဖြစ်ကြောင်း အဆိုပါဒေသခံက ဆက်လက်ပြောဆိုသည်။ 

ယခုကဲ့သို့ ဆန္ဒပြရန် တောင်ကုတ်မြို့သို့ တက်လာသူအများစုမှာ အနီးနား ကျေးရွာများမှဖြစ်ပြီး သံဃာတော်များမှာလည်း နယ်မှဖြစ်သည်ဟု ဆိုသည်။ 

ပြီးခဲ့သည့်နှစ်စက်တင်ဘာလအတွင်းကလည်း နိုင်ငံအ၀ှမ်း သံဃာနှင့် ပြည်သူဆန္ဒပြမှုတွင် လည်း တောင်ကုတ်မြို့မှ သံဃာနှင့် ပြည်သူများသည် တက်ကြွစွာပါဝင်ခဲ့ပြီး တကိုယ်တော်ဆန္ဒ ပြခဲ့သူ ကိုစိုးဝင်းက ဗိုလ်ချုပ်မှူးကြီး သန်းရွှေအား ဗုဒ္ဓဘာသာဝင်အဖြစ်မှ ထုတ်ပယ်ကြောင်း ပိုစတာကိုင် ဆန္ဒပြခဲ့သည်။ 

ဒေသခံလူထု နစ်နာနေခြင်းနှင့်ပတ်သက်ပြီး မြို့ခံတဦးက “လယ်သမားတွေမှာ တအားနစ်နာ တယ်၊ လုပ်အားခတွေ ဆုံးရှုံးတယ်၊ အဲလို အတင်းအကြပ်တွေ လုပ်ခိုင်းတော့ လုပ်ကြရတာပေါ့၊ နောက်ပြီးတော့ လယ်သမားတွေဆီမှာ တပ်ရိက္ခာအတွက်ဆိုပြီး တစ်ဧက တစ်တင်း၊ တချို့ နေရာကျတော့ တစ်တင်းနဲ့ တစ်ပြည်၊ မရောင်းမနေရကို ၀ယ်နေတယ်ဗျ။ ပေါက်ဈေးနဲ့တော့ မဟုတ်ဘူး။ တစ်တင်းကို ၂၈၀၀ ပေးတယ်။ တကယ့်ပေါက်ဈေးက ၄,၈၀၀၊ ၅,၀၀၀ လောက် ရှိတယ်”ဟု ဆိုသည်။ 

စစ်အစိုးရအနေဖြင့် ဆန္ဒပြပွဲများအား နှိမ်နင်းရန် မြို့နယ်အလိုက် သင်တန်းများပေးကာ ပြင်ဆင် နေချိန်တွင် ယခုလို တောင်ကုတ်မြို့ဆန္ဒပြမှုသတင်း ထွက်ပေါ်လာခြင်းဖြစ်သည်။