သတင်း

ပါတီဝင်မဟုတ်သူများကို ဖိအားပေး၍ ပါတီမှနှုတ်ထွက်ကြောင်း သတင်းစာတွင်ဖော်ပြခဲ့

ဗထူး။ ဇန်န၀ါရီ ၉၊ ၂၀၀၇

ဧရာဝတီတိုင်း၊ ဘိုကလေးမြို့နယ် အင်န်အယ်ဒီ(NLD)ပါတီကို အယုံအကြည်မရှိတော့၍ ပါတီဝင် (၆၅)ဦး နှုတ်ထွက်ကြောင်းဖော်ပြခဲ့သည်မှာ သာမန်ပြည်သူများကို ဖိအားပေး၍ လက်မှတ်ရေး ထိုးစေခဲ့ခြင်းဖြစ်သည်။

ယခုလ (၈)ရက်နေ့ထုတ် စစ်အစိုးရပိုင် မြန်မာ့အလင်းသတင်းစာ၏ အဆိုပါဖော်ပြချက်နှင့် ပတ်သက်၍ ဘိုကလေးမြို့နယ်မှ ပြည်သူများက မဟုတ်မမှန်ကြောင်း ပြောဆိုနေကြသည်။

“ဦးမြင့်စိုးဆိုတာက ဘာသာရေး၊ လူမှုရေးလုပ်ငန်းတွေကို လုပ်နေတဲ့လူ၊ ဦးစိုးဝင်းဆိုတာက တရုတ်ဗမာအစပ်၊ သူက စက်ပစ္စည်းအရောင်းအ၀ယ်လုပ်တာ၊ ဦးလေးနိုင်ဆိုတာကလည်း ကုန်ခြောက်ဆိုင်ဖွင့်ထားတယ်၊ ပုလဲဓါတ်မြေသြဇာရောင်းဝယ်တဲ့လူ။ ပါတီကို တခါမှ ၀င်ခဲ့ဘူးသူတွေမဟုတ်ဘူး”ဟု ဘိုကလေးမြို့ခံတဦးက ဆိုသည်။

မြို့နယ်(မယက)မှ ခေါ်ယူ၍ ပြီးခဲ့သည့်နှစ် ဇွန်လက အဓမ္မဖိအားပေးကာ ပါတီဝင်များမဟုတ်ဘဲ ပါတီမှ နှုတ်ထွက်ကြောင်း လက်မှတ်ရေးထိုးစေခိုင်းခဲ့ခြင်းဖြစ်သည်ဟု ၄င်းက ဆက်လက် ပြောဆိုသည်။

“ကျနော်တို့ ပါတီဝင်တွေမဟုတ်တဲ့အတွက် ဘယ်ကမှနှုတ်ထွက်စရာမလိုဘူးလို့ ပြောခဲ့တယ်။ နောက်တော့ ပါတီဝင်မဟုတ်ကြောင်း ရေးခိုင်းတယ်။ ပါတီဝင်မဟုတ်တာ မှန်ကန်ကြောင်းလည်း လက်မှတ်ထိုးခဲ့တယ်။ အခု သတင်းစာထဲမှာပါလာတော့ ကျနော့်အနေနဲ့ လုံးဝမကျေနပ်ဘူး”ဟု သတင်းစာတွင် ဖော်ပြခံခဲ့ရသူတဦးက ဆိုသည်။

စစ်အစိုးရအနေဖြင့် (NLD)ပါတီဝင်များ၏ နိုင်ငံရေးလှုပ်ရှားမှုများကို နည်းမျိုးစုံဖြင့် ဟန့်တား နှောင့်ယှက်၍ ဖိအားပေးလျှက်ရှိရာ နေ့စဉ်ထုတ်သတင်းစာများတွင်လည်း (NLD) ပါတီဝင်များ နှုတ်ထွက်ကြောင်း နေ့စဉ်ဖော်ပြလျှက်ရှိရာ အများစုမှာ ပါတီဝင်များမဟုတ်ဘဲ သာမန် ပြည်သူ များသာဖြစ်ကြောင်း သိရသည်။